Skip to content

Jude Lew – Unterhalten & Aufstehen

64r

Item das sein die vntter-
haben vnd die auffsteen
Im kampff

Item Wann er felt so vall mit
Im albeg zu der rechten seitten
vnd mit dem rechten knie fall
Im albeg zwischen sein pain vnd
mit der lincken hant far vmb
sein hals vnd pis nicht zu gehe
das du nit zu ser über In fallest
Vnd greiffe nach seinem degen
vnd zeuch deinen degen nicht
du habst In denn gewiß Will
er dir dann In dein degen fallen
so stich Im zu der hant vnd ruck
nicht wider etc.

64v

Item ein anders

Item Nym seinen rechten arm
zwischen dein pain vnd lege
dich auf In zwers vnd streck
dich fast vnd halt dein pein
vast zu seinen vnd greiff mit
deiner lincken hant In seinen
lincken arm vnd halt In also
vnd arbait mit der rechten hant
mit degen Das geet zu beiden
seitten.

Aber ein anders

Wenn du neben In fellest so nÿm
sein haubt vntter sein lincke
ṽchsen vnd vmb such In mit

65r

dem hals vnd leg dich mit dem
leib oben vntter sein antlütze
vnd arbeit mit der rechten hant.

Aber eins

Felt er auf den ruck so vall Im
mit deinem rechten knie zwis-
chen sein pain vnd faß Im den
rechten arm In dein lincke knie-
pügen vnd setz dich darauf vnd
begreiff sein lincke hant mit
deiner rechten hant druck Im
die vntter sein hals vnd halt
In vest mit deiner lincken vnd
arbeit mit der rechten mit dem
degen.

65v

Item ein anders

Item würfstu In auf den ruck
so falle mit deinem lincken knie
In sein rechten arm vnd mit
der lincken hant für sein hals
damit druck In fast Begreiff
Im sein lincke hant mit der rech-
ten vnd begreiff mit der linck-
en hant der rechten zu hilffe
vnd arbait mit der rechten.

Aber ein anders

Item felt er auf den ruck So
begreiffe Im paide pain vntter
den knien mit beiden henden
vnd heb sie auf vnd fall Im mit

66r

dem knie zwischen sein pain an
die hoden vnd die halt also bei-
de pain mit einer hant vnd mit
der lincken ander mit dem degen

Item pej dem hals mit der lincken
über die kelen.

Item vntter dem rechten arm durch
vnd über den halß.

Item vnderhaben wann
einer auf den pauch felt

So fall In mit dem rechten knie
In das schlaß vnd mit deiner
lincken hant greiff über sein

66v

haubt vornen an das visir vnd
zeuch übersich vnd mit dem knie
druck wider Ist sein visir offen
So greiff mit den vingern In
sein augen Oder greiff mit bei-
den henden an die hauben vnd
reme damit des hals so fellt
er wider auf den pauch.

Ein anders

Felt er auf den pauch so vall auff
seinen arm mit dem knie Im glenck
vnd prich übersich.

Item Wann er auf dem pauch leit
so sitze auff In vnd schrencke über
sein arm vnd prich sie.

67r

Item Sitz Im auf sein achseln schrit-
lingen vnd zeuch übersich.

Item sein rechte hant auf den ruck
wol übersich getaucht.

Die aufsteen Im kampf

Item greifft dir einer In dein visir
mit den vingern wenn es offen
ist von vnden auf wann du auf
dem pauch leist so slag mit dei-
ner lincken hant an sein lincken

Oder mit deiner rechten hant an
sein rechte hant vnd ruck an
dich vnd druck dein haubt zu der

67v

erden vnd hillf mit henden vnd
mit füssen so kompstu auff.

Ein stuck auf das

Begreiff sein lincke hant mit dey-
ner lincken vnd zucke an dich fall
auf den ruck vnd mit der rechten
hant begreif sein pain vnd heb
übersich So kompstu auf.

Ob du auf den ruck vilest

Als du vellest dein lincke hant
leg auf sein prust vnd wenn
er auf dich fellet so greiff mit
deiner lincken hant an sein
lincken elnpogen vnd mit der
rechten hant greiffe vntter sein

68r

linckes knie vnd heb übersich
vnd mit dem leib schüpff dich
resch auf In dem fall so kompstu
auf In.

Ein ander pruch

Oder pring dein lincken arm vmb
sein hals vnd heb mit dem rechten
pain vnd hilff mit der rechten
hant.

Item magstu das nit getan vnd
er mit dem degen arbeit so schüpf
dich albeg ausserwertz Magstu
dein lincken arm gewÿnnen so
greiff Im vntter sein hant vntter
den degen vnd thue die hant
zu wenn du greiffen wilt vnd

68v

wenn du Im die hant gefasset hast
so greiff mit der rechten an sein
lincken elenpogen vnd heb über-
sich vnd ruck das recht knie zu
dir vnd besich ob du In mügst von
dir gestossen etc.

Ein gut halten In dem ringen

Begreiff mit der rechten hant sei-
nen rechten arm hintter sein re-
chte hant vnd mit deiner lincken
hant nym Im das gewicht pej
seinem rechten elenpogen vnd
stos seinen rechten arm mit dei-
ner rechten hant wol über dei-
nen lincken arm vnd drit hintter
In vnd halt In also veste Hastu
In nit geworffen So begreiff

69r

sein recht pein hintter dem knie
vnd würffe In.

Ein gut lere

Item hastu einen vntter dich gewor-
ffen so schneide oder reiß ein gros
stuck auß seinem wappenrock vnd
stiche Im In das visir mit dem de-
gen vnd las Im das nicht ange-
wÿnnen Das ist gut Wann
es kottig oder staubig ist würffe
Im das visir voller staubs oder
gemülbs Oder stich erden ausß
mit dem degen vnd würff Im das
In das gesicht.

Aber ein lere

Item merck magstu kein plößling

69v

gesehen So schneide Im auß dem
wappenrock auf den armen oder
die hosen vnd was du sichst von
nesteln das sneid auf da vinstu
etwas das dir gut würt vnde
sich gar eben auf sein degen das
er dir damit nit schade.

Merck du magst In auch slagen
mit dem knauf oder stossen zum
hertzen wie er leit oder zu den
achseln oder zu andern glencken

Item merck In dem vorreitten slag
oben oder vnden an sein enckel vnd
zeuch oben auf sein seitten mit der
rechten hant.

70r

Also such die plösse hinden zum
leib zum gesicht, zwischen der
schultern Inwendig vntter den
ṽchsen vnd druck nit wider pis
er sichert etc.