Skip to content

Jude Lew – Rossfechten

95r

Item zu Rosß mit Ritterlicher wëre

JAgen von der prust zu seiner

rechten hant.

Vmb ker mit dem Rosß Czeuch
sein rechte hant mit deiner lincken.

Mit straiffen sattel oder nÿme
Im die wer.

Setz an hoch geswind durch far
oder prich.

Das schutten für henck allen
treffen hawen oder stechen.

Greiff an mit beden henden die
sterck.

95v

Hie heb an den man taschen
hawen zu suchen.

Wind Im die rechten hant setz
Im den ort zu dem gesicht.

Wer den stich weret dem vah
sein rechte hant mit der lincken.

Such die ploß arm leder handt-
schuch vntter augen.

Truck vast stoß vom zawm vnd
such sein messer.

Mit lerer hant ler zwen strich
gegen aller wër.

Der Schaff griff weret alle
ringen vntter augen.

96r

In der nehe vah die hant verker
sein antlutz do der nack ist.

Die Wer nach In der weitten
In dem widerreitten.

Jagstu dinck [!] so val auf swertes
klos stoß vntter augen.

Jag zu der rechten hant mit
yren künsten.

Setz an den ort gegen dem ge-
sicht.

Schutt gegen allen treffen die
ÿmmer werden.

Die sterck In dem anheben darInn
dich recht schick.

96v

Das ist In dem sper lauff der
dem andern.

Begeget vntter augen.

Der vngenant griff wer
nymant oder velt In

Ob man dich iaget von beiden-
seitten ker vmb so er rechtt
kompt.

Anderweit ker vmb so die Roß
hin hertten

Der messer nemen vnd behalten
gedenck.

Vbergreiff wer dich an vellet
oder thue Im wider reittes.

97r

Dein sper pricht
Gegenreitten macht zu nicht

– Glosa –

Item du solt wissen Wenn einer
auff dich reitt mit einer gleuen
Wie du dich gegen Im schicken
solt mit deiner gleuen Also
das du Im die seinen mit ablei-
test vnd mit deiner treffest
Vnd die kunst soltu treiben auß
vier schickung Oder hintten merck
der hut sein drej mit der gantzen
gleuen vnd eine mit der halben.

Item schick dich also mit der ersten
hut, faß dein gleuen auf das
lengst vntter den arm vnd halt
Im den ort gleich gegen dem
gesicht etc.

Item schick dich also mit der andern

97v

hut vaß die gleuen als vor vnd
thue als sie dir zuswer sej vnd
senck sie nider zu deiner lincken
seitten vnd halt sie neben deines
roß hals etc.

Item die dritt hut vaß die gleuen
mit baiden henden In der mitte
vnd leg sie für zwers auf den
sattel etc.

Item die vierden hut get auß der
halben gleuen Da soltu dich mit
schicken Vaß dein gleuen auf
das lengst vntter den arm vnd
halt Im den ort gegen dem gesicht

Item auch magstu die halben gleuen
In der mitt halten mit baiden
henden vnd für dich legen als
die langen

98r

Item die stuck die auß den vier
hutten geend die du hiernach
wol hören würdest die soltu mer
lichen treiben mit sterck etc.

– Figura –

Item darumb spricht die Einvnd-
zweinczigist figur die sterck
In dem anheben darInn dich recht
schick.

Ob es empfall
Dem ende Im abschnall

Hie merck wie du die stuck
aus den vier hutten treiben solt

Item auß der ersten hut Wenn
du die gleuen auf das lengst
gefast vnd mit Im zusammen

98v

reittest So thue gleich als du
In ÿn das gesicht wöllest stech-
en In des las dein gleuen vor-
nen sincken Vnd wechsel da-
mit vnden durch sein gleuen
zu seiner rechten seitten, so get
sein gleuen auff deiner rechten
seitten hinweck vnd die dein
triffet etc.

– Figura –

Item darumb spricht die erste

figur iag von der prust zu
seiner rechten hant

Item wenn du mit deiner gleuen
vnden durch seine weichest
So las den zaum varn vnd
kum mit der lincken handt
der gleuen zuhilff vnd setz
Im an etc.

99r

– Figura –

Item darümb spricht die Sechst
figur Greiff an mit baiden hen-
den die sterck

Item die ander hut Wenn du den
ort lest hangen zu deiner linck-
en seitten vnd du mit Im zusammen
reittest so streich stet auf mit
der gleuen zu seiner rechten
seitten vnd las den zaum faren
vnd kum mit deiner lincken
hant der gleuen zu hilff als
vor etc.

Item auß der dritten hut Wenn
du die gleuen hast In der mitte
mit baiden henden vnd du mit
Im zusammen reittest So setze
Im sein gleuen ab mit dem for-
dern teil deiner gleuen vnde
reit für dich vnd setz Im an etc.

Item die vierden hut Wenn du

99v

hast ein halbe gleuen vnd er ein gantze
vnd du mit Im zusammen reittest
So las den zawm faren vnd leit
Im mit der lincken hant sein gle-
uen ab vnd reit für dich vnd
setz Im an etc.

– Figura –

Item darümb spricht die zwelfft
figura Mit lerer hant ler,
zwen strich gegen aller wer.

Item du magst die halben gleuen
auch mit baiden henden In der
mitte halten vnd damit absetzen
gleich als mit der langen.

Haw drein nit zuck
Von schaiden linck zu Im ruck
Greiff In sein rechten
So vechstu In on vechten.

100r

Item ob ir baid In dem anreitten
vëlet mit der gleuen So las zu-
hant dein gleuen vallen vnd reit
zu seiner rechten seitten vnd zeuch
weder swert noch messer Würff
dein Roß vmb, also das du mit
deiner lincken seitten kommest an
sein rechte vnd wart newer auf
sein rechte hant.

Item wenn du neben In kompst vnd
hat er sein swert getzogen vnd
wil slahen So begreiff In mit der
lincken hant den elenpogen vnd
stos In oben von dir Vnd er erheb
In mit dem lincken fuß sein rech-
te seitten So vellt er etc.

Item Wiltu In nit werffen Wenn
du Im mit der lincken hant den
elenpogen begriffen hast so be-
greiff sein swert pej dem knauf
mit der rechten hant vnd zeuch

100v

es zu dir mit der lincken hant
Stoß Im den elenpogen von dir
so nympstu Im das swert etc.

– Figura –

Item darümb spricht die dritt
Figur, mit streiffen sattel oder
nym Im die wer.

Item Oder nÿm den sunnen zaigen

Item Greifft er dir mit der rech-
ten hant vnd mit deiner lincken
durch nach dem zawm so vah
Im die hant mit dem zawm etc.

Item vert er dir mit der Rechten
hant vornen an die prust oder
an den hals So begreiffe In
pej der hant mit deiner rechten
vnd thue Im den vngenantten
griff oder wend dein roß von
Im So vellt er etc.

101r

Item Wenn du mit deiner rechten
hant die seinen begriffen hast
So nÿm das gewicht mit deiner
lincken pej dem elenpogen. Auch
magstu den verporgen griff mit
nemen ob du wilt etc.

Item die stuck treib Wenn du gleich
mit Im einher reittest zu seiner
rechten seitten etc.

– Nota –

Ob du mit der lincken seitten nicht
magst an In kommen Wenn ir ge-
felet habt mit der gleuen So
reit an In mit deiner rechten
seitten vnd würff In mit den
Sunnen zaigen.

Item wolt er sein swert ziehen
so far Im mit deinem rechten
arm durch seinen rechten vnd
druck In vast zu dir vnd wende
dein Roß von Im so fellt er etc.

101v

Item hat er dann sein swert ge-
czogen vnd wil slahen So nÿm
den schoffgriff vnd wenn du Im
den schaffgriff tust so prich Im
sein rechten arm über deinen
rechten arm mit deiner lincken
hant etc.

Item wenn du begreiffest sein rechte
hant mit deiner lincken So
truck die für dein prust vnd
wend dein roß von Im so felt er etc.

– Figura –

Item darümb spricht die ander
figur Vmb ker mit dem Roß
zeuch sein rechte hant mit
deiner lincken.

Item Wenn du Im sein hant be-
griffen hast als vor, so leg dich
mit der prust vast auf seinen
arm vnd reit für so muß er
aber hin weck etc.

102r

Item fert er hoch auf mit den ar-
men er hab ein swert oder nicht
So begreiff mit der rechten hant
seinen elenpogen mit dem rechten
fuß erheb Im seinen rechten So
muß er vallen etc.

Item hat er ein swert So begreif
Im mit der lincken hant seinen
rechten elenpogen vnd mit der
rechten hant sein swert bej dem
knauff vnd stoß mit deiner lincken
vnd zeuch mit der rechten das
swert zu dir So nÿmpstu es Im etc.

– Figura –

Darümb spricht die Ailfft figur
Truck vast, stoß vom zawm
vnd such sein messer etc.

Das gleuen stechen
Fechten sittiglichen hüt ler prechen

102v

Das soltu also vernemen Vnd wiß
auch das du mit der gleuen nit
solt hürtten durch rauschen, wenn
du solt damit sittiglichen reitten
vnd nit rennen Wann wer da
rentt vnd hurrt mit der gleuen
der mag noch kan damit kein
kunst getreiben noch vorteil such-
en etc.

Item Wenn du sittiglichen reittest
So magstu mit der gleuen die
stock wol prauchen die vor dir
geschriben sten etc.

– Figura –

Darümb Spricht die zwuvnd-
zweintczigist figur Das ist In
dem sper lauff der dem andern
begegnet vntter augen

Item das ist das sie also fürsich-
tig mit der gleuen zu roß oder

103r

mit dem swert vnd dem ringen
soltu behend sein zu roß vnd nit
langksam als du hiernach wol
hören würdest etc.

Item hie sein außgericht die vier
hut mit der gleuen.

Nota hie heben sich an die vier
hut mit dem swert zu Rosß

Item die erst hut, leg dein swert
mit der mitte auf die lincken
hant zu dem zawm.

Item die andern hut, halt dein
swert neben dir an dem rechten
pain vnd das der ort übersich
stee gegen dem man.

Item die dritt hut, halt dein
swert hoch auf deiner rechten

103v

seitten das dein dawmen vnden
sej vnd heng Im den ort zu dem
gesicht etc.

Item was man auß den vier huten
vechten sol das vindestu hiernach-
geschriben

Die stuck treib auß der ersten
hut von dem lincken arm.

Ob sich verwandelt 

Das swert gegen swert wirt ge-
                                             handelt
Recht vaß die sterck
Tauschen hawen such vnd merck.

Das ist ob ir baid von der gleuen
wert kommen vnd wie das zu-
gangen wer ee er zu seinem
swert wer kommen vnd du zu deinem.

104r

Item So reit zu seiner rechten seiten
vnd leg dein swert auf dein
lincke hant Hawet er auf dich
ein obernhaw so fach hoch auff
mit deinem swertt vnd versetz
den haw mit der langen schneiden
In der sterck deines swerts das der
ort zu seiner rechten seitten stee vnd
In dem stich Im nach dem hals, fert
er hoch auf mit der versatzung
vnd wert den stich So haw Im
mit der langen schneiden nachdem
zawm oder nach der lincken hant
vnd reitt neben Im hinweck.

Item ob dich das Roß übertrage
das du Im die hant noch den zawm
nit erlangen magst So haw Im
nach dem rechten pain In dem
hinreitten etc.

– Figura –

Item das lert die Sibent Figur

104v

Hie heb an den man taschen hawen
zu suchen etc.

Item wenn du Im den haw versetzet
hast als vor vnd wilt der vorigen
stuck nit treiben So far Im mit
dem knauff Inwendig über sein
rechte hant pej dem gehültz vnd
truck die vast an dein prust vnd
reit für dich so nÿmpst Im sein
swert vnd die stuck treib auß
der obern hut von der rechten
seitten etc.

Ler wol schutten alle treffen on for
Damit In not an setz verstraiff
heng Im zu dem hor.

Hie merck wie du den man zwin-
gen solt das du Im ein vorteil an
gewinst vnd das du Im mit sterck

105r

da zwingest du In mit das er sich
muß plos geben, das weist die
fünfft figur als auß etc.

– Figura –

Item das ist das du In allen an pün-
den solt starck sein mit der gleuen
vnd mit dem swertt vnd albeg
mit dem ort des gesichts remen
Das lert die Newnczehent figur etc.

– Figura –

Das schutten fürhenck allen treffen
hawen vnd stechen etc.

Item Wenn du starck pist so merck-
estu wol ob er hert oder swach ist
vnd das ist das fulen oder enpfinden

Item haw Im ein oberhaw zu dem
kopf starck versetzt er vnd ist
waich am swertt so setz Im denn den

105v

ort an Setzt er den ort ab auff
sein lincke seitten so far von vnden
auf durch sein swert mit deinem
knopff vmb seinen hals vnd reitt
für dich Oder wentt dein Rosß
vmb so felt er etc.

Item versetzt er dann den überhaw
hoch so nym den schaffgriff

Item versetzt er den hawen So treib
das Sunnen zaigen mit dem
swert vntter dem kinpacken etc.

Item haw Im aber ein überhaw zu
dem kopff Vert er hoch auf mit
der versatzung so far mit deinem
gehültz vntter seinen elenpogen
Vnd mit dem rechten fus far
vntter sein steickleder vnd stos oben
mit dem gehültz vnd heb vntten
mit dem fuß so fellt er etc.

106r

– Contra –

Item versetz er dir den überhawe
mit der zwer So far hoch auff
mit deiner rechten hant vnd
heng Im den ort über sein swert
zu seinem gesicht oder der prust
vnd setze Im an etc.

Item wenn er dir versetzt mit der

zwer So far hoch auf mit dei-
ner rechten hant vnd far Im mit
dem swertt durch seinen rechten
arm Vnd begreiff Im sein arm
mit deinem Vnd reit für dich
So nÿmpstu Im das swert.

Das lert die vierd figur etc.

Item die stuck soltu treiben auff
der nebenhut bej dem rechtten
pein etc.

106v

Wiltu gerüet
langk iagen das ser müet
Wer das wert
So wind das auch ser versert
Wert er fürpas
Voh den zawm vnd pis nit las

Item Wenn du reittest mit der
hut zu dem man So stich ge-
recht für dich langk aus mit
gerackten armen dem man zu
dem gesicht oder der prust So
muß er versetzen etc.

Item wenn er dir den stich versetzett
vnd weist den ort beseit auff
auf sein lincke seitten so far mit
dem rechten arm hoch auf In
das ober gehenck Stich Im zu
dem gesicht

107r

Item wert er den stich vnd fert
hoch auff So reit an In vnd far
mit deiner lincken hant von In-
wendig auf über seinen rechten
arm Vnd mit lincker verkertter
hant so hast In gefangen pej
dem arm etc.

Bedenck die ploß
Such messer nit wart des kloß.

Das ist wenn du In mit dem
zaum also gefangen hast, als
vorgeschriben steet Vnd ist er
gewappent so soltu wissen wo
du In plos vindest also das du
In gewÿnnen mügst etc.

107v

Die plösß

Item also such die plöß Eine vn-
tern ṽchsen

Item die andern außwendigk
In die hantschuch oder kener. [!]

Item die dritt In der glenck der
armbug oder vntter dem ge-
sicht etc.

Item die ploß soltu suchen mit
dem ort des swerts Wann du
magst mit schlegen mit dem
swert noch mit dem knopff
dem gewappenden man nicht
geschaden Das lert die zehent
figur etc.

108r

Nota die stuck treib aus der hut
von dem sattelpogen etc.

Item Wenn du mit der hut reittest
zu dem man Hawet er dir dann
zu dem kopff von seiner rechten
seitten ein überhaw So far mit
dem swert auff von dem Sattel
vnd wind damit hoch für das haubt
das der tawmen vndten kumme auf
dein lincke seitten so vechstu dann
gehawen In dem gehültz In des stich
Im zu dem gesicht zu seiner lincken
seitten etc.

Türckisch haw

Item weist er den stich ab zu seiner
lincken seitten So reitt neben Im
hinweck vnd haw In mit der  langen
schneiden hindan In den hals, vnd
das ist der Türckisch hawe

108v

Das swert nemen

Item Wenn er dir den stich abweist
zu seiner lincken seitten vnd wiltu
den Türckischen haw nit treiben
so reit für In vnd far Im mit dem
kauff [!] aussen über sein rechte hant
vnd staße In mit deinem gehültz
für dich Vnd mit der linckenn
hant begreiff seines swerttes
knopff vnd reit für dich vnd
so nympstu Im das swert etc.

Item hawet er von seiner lincken
achseln auf dich einen überhaw
So wind mit dem swert hoch auf
deine rechten seitten gegen seinen
haw vnd stich Im zu seiner rechten
seitten zu dem gesichte etc.

Item reitt einer auf dich mit der
gleuen vnd an welcher seitten
er dir will ansetzen da wind gegen

109r

Im mit dem swert an sein gleuen
als vor vnd stich In zu dem gesicht
oder wo du In magst gehaben etc.

– Figura –

Das lert die Acht figur die spricht
Wind Im die Rechten hant Setz
Im den Rechten ort zu dem gesicht
Vnd das ist das du solt albeg win-
den mit dem swertt zu Roß auß
der hut Es sej gegen der gleuen
oder gegen dem swertt vnd In
das den man stechen zu der plösse

Item vnd wenn du Im also zu der plösße
stichest. Weret er dann den stich
vnd kompt nahent an dich So
begreiff Im sein rechte hant mit
deiner lincken vnd treib die ringen
die vor vnd nach geschriben steen.

109v

– Figura –

Item das lert die Newnt figur
die spricht. Wer den stich weret
dem vach sein rechte hant In dein
lincke etc.

Das ist ein hut mit dem
halben swertt

Item Wenn du hast gelegt das
swert auf dein lincke hant zu
dem zawm So las den zawm
farn vnd greiff mit der lincken
hant mitten In die klingen vnd
halt dein swert also vor dir etc.

Item Reitt einer zu deiner rechten
seitten auf dich mit der gleuen
So setz ab mit dem swert von
deiner lincken hant vnd schlag
dein swertt vntter die ṽchsen vnd
setz Im an etc.

110r

Item Reitt er zu deiner lincken
seitten mit der gleuen So far hoch
auf mit dem knopff vnd las
den ort hangen zu deiner lincken
seitten vnd setz also ab vnd setze
Im an etc.

Item ligstu In der hut vnd hawet
er dir oben zu so far auff
vnd fach den haw zwischen dein
baid hend vnd heng Im den ortt
zu dem gesicht vnd setze Im an etc.

Item Auch magstu Im mit dem halben
swertt absetzen was auf dich
gestochen württ es sej mit der
gleuen oder mit dem swert Darumb
soltu mit der lincken hant deinem
swert auch zuhilff kommen wenn
es dir not ist als der gleuen
Als die Sechst figur lert etc.

110v

Zwen strich ler
Mit lerer hant gegen der wer

Verporgen

Item das ist die allerpeste kunst
als sie In dem Roßuechten sein
mag vnd ist verporgen vnd get
zu mit der lincken hant Vnd
darümb soltu wissen den zawm
anczurichten das du die lincken
hant mügest frej gehaben wann
du wilt vnd dennoch deins roß
mügest mechttig gesein mit dem
zawm Vnd das ist gearbeit mit
lediger hant etc.

Item Wann mit der rechten hant
mustu die gleuen oder das swert
halten Darümb spricht die zwelft
figur mit lerer hant ler zwen
strich gegen aller wer

111r

Item was kunst du mit lediger
hant solt treiben gegen der
gleuen oder gegen dem swert
oder mit Ringen das vindestu
In den Glosen alles geschriben.

Der Schofgrif weret
Wer sich ringens zu dir keret
Als vntter augen
Greif In an recht mit slaugen

Ringen vntter augen

Merck das ist der pesten Ringen
eins als es zu Roß gesein mag
darümb heist es der Schofgrif
das es nit yderman verstan sol.

Item oder In den Gloßen heist es

der schofgrif Wann der schoff
ist der recht arm deins wider-
sagens So sotu albeg nach greiffen

111v

Wenn du zuroß ringest Wenn mit
der lincken hant helt er den zawm
die ist dir nit also schedlich etc.

Item du solt wissen das das ringen
gleich vorn zu dem man zu get
vntter augen zu seiner rechten
hant etc.

Schofgriff

Item Wenn du wilt ringen so reit
dem man zu der rechten seitten
vnd greiff In an mit ringen
Greifft er dich wider an so be-
greiff mit deiner lincken hant
seinen rechten arm hintter seine
hant vnd zeuch den arm für dich
vnd far mit dem rechten arm
über vnd druck damit nider vnd
begreiff damit den sattelpogen vnd
reit für dich so muß er fallen
Vnd wiß das du mit dem ringen
prichest alle ringen damit man

112r

dich vornen anfellet Darümb
spricht die dreÿtzehent figur.

Der Schofgrif Weret alle griff
ringens vntter augen.

Item Auch magstu In treiben wenn
du zu seiner lincken seitten zu reit-
test wenn er sich wil weren mit
der lincken hant

Wer dich an vellet
Wider reittens der wirt gefellet
Hanges gen der erden
Vbergreif In recht mit geperden

Item das ist ein slechtes ringen
Reitt dir einer zu der rechten
seitten vnd vert dir mit seinem
rechten arm vmb den hals, far Im

112v

also vmb den seinen vnd halt In
vast hintten pej der Joppen oder
was er an hat vnd henck dich
nider auch In die lincken seitten
als du von dem Roß wöllest fallen
vnd zeuch In also nach dir von dem
Roß. Hastu dich zu ser nider ge-
hangen das dich duncket du müst
auch vallen so halt In vast so ze-
ucht er dich wider ein hin In den
sattel mit seinem fall etc.

Czu baiden seitten
ker dich an In on wider reitten.

Item Merck das ist das du dich
In allen anreitten nahent zu
dem man solt halten Wann du
dich zu roß mit einem fohen wilt

113r

oder ringen Ettlich hofleut treiben
ir stuck an dem zureitten zu dem
man Darümb wenn du an den
man kompst So bleib pej Im vnd
las In zu keinen dingen nach stuck-
en kommen

Item Merck reittestu Im zu seiner
rechten seitten So treib die stuck
die zu der rechten seitten gehörn
Reittestu zu der lincken seitten so
treib die stuck die zu seiner lincken
seitten gehörn Vnd also mag
er zu keinen stucken kommen wann
es ist Im zu kurtz etc.

Ob du wilt reitten
Roß lauffs zu der andern seitten
Die sterck schut
Damit on nott

113v

Wer dir das weret
Swert vah trag nahent der hant

Zu der lincken seitten

Item Merck das ist wiltu einem
zu der lincken seitten reitten So
soltu starck sein mit der wer es
sej gleuen oder mit swert vnd
wart ob du dem man mügest
den ort angesetzen, da soltu In
mit zwingen gleich gleich als
du zu der rechten seitten hast
geton Damit zwingstu In zu
den stucken die man zu der linck-
en seitten treiben sol Wenn es
seindt ettliche stuck die man zu
der lincken seitten treibt die da
zu der rechten seitten nit mügen
geen etc.

114r

– Figura –

Item darümb spricht die zweinczi-
gist figur Schut gegen allen
treffen die ymmer werden, das ist
das du solt stercken In allen an win-
den etc.

Swert nemen

Item Wenn du zu dem man reittest
zu seiner lincken seitten mit einem
überhaw So stich Im nach der
plösße mit gestrackten armen vnd
hauet er mit dir gleich ein vnd
ist starck mit dem swert vnd
wil dich überstercken vnd sucht
dir die plöß auß mit dem ort so
far mit deinem lincken arm von
Inwendig aussen über sein swert
vnd truck das fast In dein lincke
seitten vnd reit neben Im hinweck
So nÿmpstu Im das swert Vnd
das leret die Sechczehent figur
die spricht Die wer fach In der
weitten In dem widerreitten etc.

114v

Item ob du nahent an In kompst
so far mit deiner lincken hantt
auff sein rechte hant vnd las
In damit nit zu der wer kommen
vnd treib mit der lincken hant
die stuck vnd ringen die dauor
vnd nach geschrieben steen etc.

Oder vmb ker
Gerwt zu iagen der wer
Mit allen kunsten
Der da iagt der schicktt nach guste[n]

Item Wenn du mit einem zu der
lincken seitten zu reittest vnd
dich dein Roß übertrüg das du
zu den vorgeschriben stucken nit

kommen möchst So las dein Roß
nit ferrer von Im lauffen vnd würff
das Roß vmb auf dein lincke seitten

115r

Also das du mit deiner lincken seitten
an sein rechte kummest vnd treib die
stuck vnd die ringen vnd alle kunst
die zu der rechten seitten gehören
die dauor geschrieben steen etc.

– Figura –

Item das lert die Achtzehent figur
die spricht Jag zu der rechten
hant mit Iren kunsten etc.

Ob du vertzagest
Vnd an danck linck iagest
Sein swert auf rast
Ring vnd stoß nit vast.

Item Merck das ist ob dein Roß also
hertmeulich wer, oder das sich
dein widersach also gen dir weret
das du on danck must zu seiner

115v

lincken seitten zu reitten So leg
dein swert In die hut auff die
lincken hant etc.

Item hawet er dir dann oben zu
dem kopff so far auff vnd versetz
mit der langen schneiden vnd kom
mestu mit der versatzung nahent
an In So far mit deinem lincken
arm über sein rechte hant Vnd
truck die vast über sein lincke
seitten vnd stoß In mit dem knauf
wa du hin wilt etc.

– Figura –

Item das lert die Vierczehent figur
die spricht Jagstu linck so vall
auf swerttes klös stoß vntter augen

– Swert nemen –

Item Wenn du Im seinen Rechten
arm In die lincken seitten truckest

116r

so reitt neben Im hinweck so muß
er das swert lassen vallen etc.

Item Auch magstu mit der lincken
hant In sein rechte mit deinem zawm
vahen vnd damit hin weck reitten.

Item versetz Im den überhaw als
vor auß der hut vnd reit neben Im
hin wegk Vnd slag In mit einem
freÿen überhaw zu dem kopf

Item iagt er auf dich mit der gleuen
wenn du In der hut ligest so far
hoch auf mit der rechten handt
mit dem knopf auf dein lincke
seitten vnd las den ort neben dir
nider hangen vnd weiß Im die
gleuen also ab Vnd hawe Im zu
dem kopff oder setz Im an zu dem
hinrennen.

116v

Item kompstu nahent an In mit
der lincken seitten vnd will er
slahen mit dem swertt so nÿm
das sunnen zaigen so mag er
sein nicht geton etc.

Item Auch magstu den Schofgrif
nemen wenn er sich mit der
lincken hant weren will

Item köme er mit seiner lincken
seitten In dein rechte vnd woltt
dich mit dem sunnen zaigen werffen
Vnd ist er starcker dann du so far
von Inwendig auf über sein linc-
ken arm mit deinem rechten Oder
ist er swecher dann du so far auß-
sen über sein lincken arm vnd komm
mit deiner lincken hant der rech-
ten zuhilff vnd truck vast wider
Vnd weicht er aber mit dem arm
So begreiff In denn mit der lincken

117r

hant vnd mit der rechten starck
darüber vnd reitt für dich so felt er.

Item hat er seinen lincken elenpogen
an deinen rechten arm gesetzt
So begreiff sein lincke hant mit
deiner lincken vnd nÿm den vnge-
nantten griff etc.

Jagt man dich rechtes
ker vmb wart vechtes
Mit armen fahen
So mag dir kein schad nahen.

Item das ist das du mercken solt
Wenn du mit einem zusammen
reitten wilt, ob er dir zu der ge-
rechten seitten wöll zu reitten
vnd dir den vorteil angewÿnnen

117v

so las In dartzu nit kommen Svnder
went dich albeg mit deiner lincken
seitten zu seiner rechten Vnd wart
das du nahent an In kompst
vnd wart seins rechten armes
mit den ringen vnd stucken die
die dauor vnd nach geschriben
steen etc.

Item wer das sach das du getrungen
würst das du fliehen must vnd
reitt dir dann einer hinden zu
deiner rechten seitten mit einem
spieß oder swert vnd wolt daran
setzen So wind dich aus dem stich
gegen Im auf dein lincke seitten
vnd wind mit deinem swert gegen
seinem spiß oder swert das dein
dawmen vnden kem vnd setze Im
an etc.

Item reitt er dir zu der lincken seit-
ten So wend dich auf dein rechte
gegen Im vnd windt mit dem swert
als vor vnd setz Im an etc.

118r

– Figura –

Item das lert die viervndzweintzi-
gist figur die spricht Ob man dich
jaget von baiden seitten ker vmb
linck so er recht kompt

Item Auch soltu In der flucht behend
sein also das du dich wol könnest
vmb keren In dem Sattell von ey-
ner seitten zu der andern vnd mit
dem hinttersich stechen zu baiden
seitten etc.

Die swert nemen
behalten ler an schemen

Hie merck wie du einem sein swert
nemen solt vnd In dartzu behalten
das er sich nit geweren mag

Item Reitt zu der rechten seitten

118v

vnd such sein plöß wie du magst
mit hawen oder mit stechen, ver-
setz er vnd kompt nahent an
dich so begreiff seinen rechten
arm hintter seiner rechten hant
mit deiner lincken vnd verkertten
hant vnd ruck den für dich vnd
halt In vest hin bej vnd beig dei-
nem lincken arm außwendig
an sein pindt seins swerttes So
muß er das swert lassen fallen
vnd wenn du In pei dem arm also
heltest so magstu In mit dem swert
slahen oder mit dem schofgriff werf-
fen wie du wilt Oder mit dem
zawm fahen etc.

Item das lert die funffvndzweintzi-
gist figur vnd spricht Die mes-
ser nemen vnd behalten gedenck

Den vngenantten den starcken
Verwent ir stechen
Ir slahen verdirbt on alles vechten

119r

Hie merck Wann du einen starcken
solt das er zu keiner wer kommen
mag Vnd das stuck treib wann
du mit deiner lincken seitten an
sein rechte kommest etc.

Vngenant

Item wann du mit deiner lincken seitten
an In kommest vnd hat er dann sein
wer getzogen es sej swert messer
oder degen vnd wil dich slahen
oder stechen So begreif mit deiner
rechten hant seinen rechten arm
vorn pej der hant vnd reid Im den
vmb vnd ruck den vntter dein prust
vnd leg dich mit dem leib darauf
so brichst Im den arm Das ist
der vngenant griff

Swert nemen.

Item wiltu den arm nicht prechen
wenn du In hast geruckt vntter dein

119v

prust So greiff mit deiner lincken
hant an sein rechten elenpogen
vnd stoß In damit von dir vnd be-
greiff mit deiner rechten hant
sein swert pej dem knopff oder pej
der hanthaben vnd ruck da mit
an dich so nÿmpstu Im das swert
Das leret die dreÿvndzweincz-
igist figur Die spricht der vn-
genant griff war nympt oder
felt In etc.

Wiltu anfassen
Neben reitten das soltu nit lassen
Das sunnen zaigen
Den lincken arm wiltu naigen
Das vorhaubt tast
Gegen nack truck ser vast
Das er sich swencket
Vnd selten wider auf glencket

120r

Sunnenzaigen [Der Text läuft oben aus der Seite heraus (beschnittenes Buchformat?).]

Das ist faffendingens ringen
das magstu treiben zu allen seiten
wo du an den man kommest

Item das treib also, kompstu mit
der Rechten seitten an sein rechte
Wann ir zusammen reittent so halt
dich vast an In vnd greiff mit
deiner lincken hant hinden vmb
In, vnd begreif In da mit seinem
lincken arm vnd zeuch In vast
hervmb zu dir vnd mit deiner
rechten hant greif Im vnden an
sein kinpacken vnd stoß In dann
vast von dir über sich auf an
sein lincke seitten So kerstu Im
sein antlütz auf gegen der sunnen
Damit gewinstu Im den swanck
an das er sich nit mag gehalten
Würfst In für dich von dem roß etc.

– Figura –

Item darümb spricht die fünfftzehent

120v

In der nehe vah die hant verkere
sein antlutz da der nack ist etc.

Item das ringen heisset das sunnen
zaigen darümb das es yederman
nicht vernemen sol wann es ist
verporgen

Item kompstu mit der lincken seitten
an sein rechte So begreiff als vor
vnd würff In hintter dich auff
sein lincke seitten etc.

Wer dir das remet
Vbergriff den der wirt beschemet
Truck arm zu haubt
Der griff offt sattel beraupt

 – Bruch –

121r

Merck hie lert er wie man das
sunnen zaigen prechen sol vnd
der brůch ist mer dann einer vnd
sein auf swach vnd auf starck
leute.

Item kompt einer mit seiner rechten
seitten an dein rechte vnd ist starck
vnd will dich werffen mit dem
Sunnen zaigen Vnd wenn er dir
greifft mir der rechten hant an
den kynpacken So slag dein rechten
arm oben über sein rechten vnd
truck In vast an dein prust vnd
leg dich mit dem leib darauff
vnd reit für dich so würfst In etc.

Item kompt er mit seiner lincken
seitten an dein rechte vnd hat be-
griffen deinen lincken arm mit
seiner lincken hant So wend dich
gegen Im vnd far gerichts Inwen-
dig auf mit deinem rechten arm
vnd truck In hinden mit der sterck
deins armes seinen arm hinwegk

121v

vnd slag damit den arm über
sein vnd reit für dich etc.

Item Ist er nicht starck vnd kompt
mit seiner lincken seitten an dein
rechte vnd greifft mit seiner
lincken hant nach deiner lincken
So far von vnden auf hinder
dich über sein lincken vnd reck
den arm gerichts auf vnd truck
Im damit den seinen vast hinden
pej seinem nacken vnd reit für dich.

Item wiltu den arm nicht auff
recken So slag In über sein arm
vnd truck vast nÿder

Item auch magstu mit deinem rechten
arm von Inwendig auf über
sein lincken slahen vnd hinden
an dich trucken vnd hinweck
reitten

122r

Wiltu aber dich massen
Das vahes leicht von dir lassen
Ringest dann für
Gefangen hin on schnür.

Item das Ringen heisset das ver-
porgen ringen Vnd ist der pesten
eins Wann es gleicht sich wol
dem schofgriff Wann du damit
einen heltest er sej starck oder swach
vnd magst In also halten das er
sich nit geweren mag wie lang
du wilt wann du In anders recht
begreiffest

Item Wiltu aber thun als die leicht-
ferttigen meister die ir kunst ge-
ring wegen durch rumps willen
vnd machen die kunst gemein
die sie können oder wissen. Vnd
darümb werden sie vnbehalten
von andern weisen meistern vnd

von Rittern vnd knechten

122v

Item wiltu das Ringen offenbar
machen oder yederman sehen
lassen So thue Im also Reitt
mit deiner lincken seitten an sein
rechte vnd greiff mit deiner
rechten hant sein rechten arm
vorn pej der hant vnd truck
den für dich vnd reid vmb mit
deiner lincken hant greif an
seinen rechten elenpogen vnd
stoß den von dir vnd mit der
rechten hant stoß seinen rechten
arm aber über dein lincken arm
gar wol vnd heb also mit deinem
lincken arm sein rechten arm über
sich auf Vnd also hastu In ge-
fangen vnd gepunden on alle
pant Vnd magst In also halten
wie lang du wilt, das get zu

beiden seitten zu etc.

Der vorgriff merck
Der pricht fürpas sein sterck

123r

Merck das ist das du albeg solt
vor kommen ee wann er mit den
greiffen vnd ringen die du wol
vernommen hast Vnd zuuorauß
mit den vier haubt ringen, da
lest er In mit zu keinem ringen
oder stucken kommen, das ist der
schoffgrif Der vngenant grif
Der sunnen zaigen Vnd der
verporgen grif Vnd des vahes
mit dem zawm soltu damit auch
nicht vergessen Vnd wenn du
die Ringen wol kanst so mag
dich hart nÿemant on schaden
von dem Roß gewerffen

Hie hat ein ende des Juden
kunst den man nant den lewen

– als sich zuroß wol gepůrt

123v

Czu Roß streitten
Lern von baiden seitten
Darnach wiß
Dein Ros gůrtt gewiß
Vnd merck die seitten
So du auf vorteil begerst streitten
Wer auf dich synnet
Sein swert zu dir kummen gewynnet
On zweifel wind du an
Wiltu keinen schaden han
Darnach merck
Die gleuen prauch mit sterck
Vaß dein zawm langk mit synnen
Wiltu mit kunst begÿnnen
Darmach zu streitten
Die gleuen zwer über ein seitten
Reitt mit synnen
So du absetzen begerst gewÿnnen
Recht langk las hangen
Das lob ich wiltu rangen
Wer auf dich will hewen
Versetzen soltu dich frewen
Wann du hast versetzet

124r

So sein alle dein hew geletzet
So vinstu schnidt
Hintten vnd vorn mit
Darnach Im abhawe
Zawm linck pain sunder Im drawe

124

Blatt Vrstg

124v

Jeremias p[rophe]htta

Hanns Deichsler

125r

(Bibliotheksstempel:) P. Öttingen
Wallerstein’sche
Bibliothek
[Nicht auf den Farbscans – nicht verifizierbar.]